Txaber Altube nagusitu da Bizkaiko Bertsolari Txapelketako kanporaketan

BERTSOLARITZA. Amorebieta-Etxanon jokatu zen, herenegun, Bizkaiko Bertsolari Txapelketako hirugarren kanporaketa, eta Txaber Altube nagusitu zen, 478 punturekin. Horrenbestez, abenduaren lehenean Lekeition jokatuko den finalaurrekoan kantatuko du abadiñarrak. 300 bertsozaletik gora elkartu ziren saioan, eta, Altuberen atzetik, hurrenez hurren, Ander Elortegi, Unai Mendiburu, Ander Urzelai, Inazio Vidal eta Aitor Esteban sailkatu ziren.