'Un prophète' filmeko gidoilaria bere lanaz mintzatuko da

Bilboko Zinebi jaialdiaren atarikoak prestdituzte jada. Ekitaldirik aipagarrienetako bat Euskal Herriko Gidoigileen Elkarteak antolatu du. Izan ere, Thomas Bidegain Un prophète (2009) filmaren gidoilaria gonbidatu du, bere lanaz hitz egin dezan. Cannesko jaialdian Epaimahaiaren Sari Nagusia irabazi zuen film horrek, eta Oscar sarietarako hautagai izan zen ingelesez besteko film onenaren atalean. Bidegainek bere lanaren inguruko azalpenak emango ditu hilaren 10ean, eta «fikzio zinematografikoa eraikitzeko» duen moduaren ikuspuntua azalduko du. Hitzaldiaren ondoren, filma emango dute.

Delphine Seyrig antzezle, zinemagile eta militante feminista hil zenetik hogei urte pasatu direla eta, azaroaren 17an eta 18an omenaldi bat egingo dio Simone de Beauvoir taldeak, Bilboko Emakumeek Egindako Zinema Erakustaldiaren antolatzaileak. Europako zineman oso ezaguna egin zen Seyrig, 60ko eta 70eko hamarkadetan egin zituen lanengatik. Nicole Fernandez Parisko Simone de Beauvoir Zentroaren koordinatzaileak aurkezturik, hiru film emango ditu PreZinebik: Scum Manifiesto (1976), Maso et Miso vont un bateau (1976) eta Sois belle et tais-toi (1981).

'80 egunean' eta Afrika

Euskal zinemak ere izango du bere tartetxoa PreZinebin. FAS zineklubak 80 egunean filma emango du hilaren 16an. Jon Garaño eta Jose Mari Goenaga zuzendariak bertan izango dira, aktore nagusiekin batera: Itziar Aizpuru, Maria Asun Pagoaga eta Jose Ramon Argoitia.

Bestalde, haurrek Afrikan duten egoera latza azaltzen duten nazioarteko hainbat film labur erakutsiko dituzte, tartean Africa's Child, Roofless eta The Sharing Day. PreZinebin, hilaren9tik 20ra bitartean, ekitaldi gehiago ere izango dira Euskal Herriko zinema eskolak eta ikus-entzuneko alorra indartzeko asmoarekin. Horien artean dago Zinebiexpress lehiaketa. Izen-ematea azaroaren 13an izango da, eta lehiakideek 48 ordu izango dituzte film labur bat egiteko.