Joan den urtearen amaieran egin zuten Klaustro Sounds jaialdiaren lehen aldia Gasteizko Montehermoso kulturunean, eta, arrakasta izan zuela ikusita, egitarau betea osatu dute aurten ere. Hil honen 17tik azaroaren 24ra bitarte, formatu musikal konbentzionalaz zein berritzaileaz eta esperimentalaz gozatzeko parada egongo da. Guztira, bost emanaldi izango dira Montehermoso Kulturuneko klaustroan, 19:00etan hasita.
Lehen emanaldia martxoaren 17an izango da, Angel Celada musikaria bertan dela: Toc disko berria aurkeztuko du. Apirilaren 21ean Andres Rodrigues eta Ivan Nespereiraren txanda izango da, eta Incra ikus-entzunezko proposamena ekarrikod du. Maiatzaren 19an, berriz, Ainara Legardonek Pausar pulsa soinu instalazio performatiboa eskainiko du; eta irailaren 22an, Maite Larburuk Krak diskoa zuzenean aurkeztuko du.
Klaustro Sounds jaialdiaren azken emanaldia azaroaren 24an izango da: Naiara De La Puente akordeoi jotzaile gasteiztarrak eta Tania Cortes konpositore ekuadortarrak Somnia taularatuko dute, bien arteko elkarlanari esker sortutako diziplina anitzeko lan artistiko berria.
Jaialdiak «parekorik ez duen soinu bidaia batean» barneratzeko era eman nahi dio entzuleari, musika proposamen ezberdinak eta bereziak eskainiz, Sonia Diaz de Corcuera Gasteizko Udaleko Kultura zinegotziak aurkezpenean azaldu duenez. «Giro paregabean partekatutako esperientzia sortu nahi dugu, artisten eta publikoaren arteko zuzeneko konexioa bermatzeko».
Bihartik aurrera jaialdirako gonbidapenak eskura jarriko dituzte Entradium.com plataforman.
