XX. mendeko pentsalari esaguratsuenetakoa izan da Zygmunt Bauman; filosofo eta soziologo poloniarraren gogoetak funtsezkotzat jotzen dituzte adituek gaur egungo gizartearen aldaketak eta globalizazioak eragindako ondorioak ulertzeko. 91 urterekin hil da, Ingalaterrako Leeds hirian.
Poznanen jaio zen Bauman, 1925ean, jatorri juduko familia batean. Haur zela, Sobiet Batasunera ihes egin zuen familiarekin, naziengandik ihesi, eta Poloniara itzuli zen gerora. Varsoviako Unibertsitatean jardun zuen irakasle, harik eta postutik nahiz Alderdi Komunistatik bota zuten arte. Herrialdea utzi, eta Israelgo, AEBetako, Kanadako eta Erresuma Batuko hainbat unibertsitatetan jardun zuen irakasle.
1950eko hamarkadan hasi zen bere obra idazten eta argitaratzen, eta 50etik gora liburu eta ehundik gora artikulu idatzi zituen bere ibilbidean. Globalizazioa, modernitatea, posmodernitatea nahiz kontsumismoa hartu zituen hizpide askotan, beti ere gizarte modernoa ulertzeko gakoak bilatu nahian.
