Arabako gizartea gero eta zaharragoa da, eta, zahartze horrekin batera, zahar etxeetako itxaron zerrendak luzatu egin dira. Arabako egoitzen sare publikoak 1.116 lagunentzako tokia zuen orain arte, lurraldeko eskaria asetzetik oso urrun. Sare publiko horren gaitasuna handitzeko neurriak hartzen hasi da Arabako Foru Aldundia, 60 leku gehiago itunduko baititu lurraldeko zahar etxeetan.
Leku horietatik, 31 Gasteizen sortuko dira, 23 Gorbeialdean, eta sei Aiaraldean. Urritik aurrera prest egotea espero du aldundiak. Eta leku berri horiei Samaniegoko adinekoen egoitzaren irekiera gehitu behar zaio, bi urteko zaharberritze lanen ostean. 44 leku ditu egoitza horrek. Orotara, beraz, sorturiko leku berriekin eta Samaniegoko egoitza berrituarekin, Arabako zahar etxeen sare publikoak 1.220 lagunentzat izango du lekua udazkenetik aurrera; 104 toki gehiago, alegia.
