Irailaren amaieran, Arabako kirol jardueren sektoreko enpresen batzordeak —ELA, LAB, CCOO eta UGT sindikatuetako ordezkariek osatzen dute— bost lanuzte egunetarako deia egin zuen. 2026 guztia zeramaten sindikatuek eta patronalak sektoreko VI. hitzarmena sinatzeko negoziazioetan, baina, patronalak elkarrizketak amaitutzat jo zituenean irailaren 2an; sindikatuek, «hobekuntzak» zeudela onartuagatik, salatu zuten oraindik ere ezadostasun nabarmenak zituztela, antzinatasuna, baimenak eta «ordu hilen» kudeaketa tarteko. Nolanahi ere, antolatutako lanuzte horietako lehenengoa egin baino lehen iragarri du ELA sindikatuak hitzarmenerako aurreakordioa sinatu dutela, gaur.
Urriaren 7rako deitua zuten sindikatuek lehen lanuztera. Hala ere, ELAk hasieratik adierazi zuenez, uste zuen «akordioa oraindik posible» zela, eta adostasunik erdietsi ezean soilik eutsiko zien mobilizazioei. Bada, sindikatua ados jarri da patronalarekin, eta, hortaz, gainerako sindikatuen erreakzioak oraindik plazaratu ez badira ere, pentsatzekoa da mobilizazioak bertan behera geratuko direla. Akordioak «lanaldi murrizketak, soldata hobekuntzak eta baimen osagarriak» barne hartzen ditu. Urteko lanorduak 1.550era jaitsiko dira, soldatak KPIaren arabera handitu, eta igandeetako plusak %50 igo.
