Aiaraldea komunikabideko kazetari bati eraso diote desokupazio enpresa bateko (Desokupacionlegal.com) kideek. Aiaraldearen arabera, «etxe bat legez kanpo husteko asmoz» bertaratu da enpresa Luiaondora (Araba): «Indarrez sartu dira etxera, eta barruan zeudenak kanporatu dituzte».
Komunikabide bereko kazetari bat bertaratu da gertaeraren berri ematera. Irudiak grabatzen ari zela, desokupazio enpresako kideek «sakelakoa bota, eskua zapaldu eta mehatxuak egin dizkiote». Aiaraldeak zehaztu duenez, kazetariak salaketa jarri du Laudioko (Araba) komisarian, gertatutakoaren harira.
Ertzaintza eta Laudioko Udaltzaingoa bertaratu dira tokira. Polizia iturriek baieztatu dute desokupazio enpresa bat egon dela Luiaondon, baina azaldu dute operazioa oraindik irekita dagoela eta, beraz, oraingoz ez dutela informazio gehiago emango.
