Arabako etxez etxeko laguntzako hitzarmenaren negoziazioan «aurrerapausoak» emateko eskatu du ELAk

Sindikatuak «benetako» inplikazioa exijitu die AESAD patronalari eta Arabako erakundeei. Sektoreko langileen lan eta soldata baldintzak hobetu ezean, mobilizazioak «areagotuko» dituzte datozen asteetan.

ELA sindikatuak gaur Arabako Foru Aldundiaren aurrean egindako elkarretaratzea. ELA
ELA sindikatuak gaur Arabako Foru Aldundiaren aurrean egindako elkarretaratzea. ELA
Aratz Aranburu
2026ko urriaren 30a
14:21
Entzun 00:00:00 00:00:00

ELA sindikatuak Arabako etxez etxeko laguntzako hitzarmenaren negoziazioan «zuzenean inplikatzeko» eskatu die AESAD patronalari eta lurraldeko erakundeei. Sindikatuak salatu du negoziazio mahaia eratu zenetik «ia urtebete» igaro den honetan aurkeztu duela patronalak bere lehen proposamena. ELAk, gaur goizean Gasteizen egindako mobilizazioan, argi utzi du sektoreko langileen lan eta soldata baldintzak hobetu ezean mobilizazioak «areagotuko» dituztela.

Sindikatuaren arabera, AESAD patronalaren planteamenduak «%0ko soldata igoera» jasotzen du 2026rako, eta %2koa 2027rako, eta ondorengo urteetako hobekuntzak zerbitzuaren «esleipenen mende» uzten ditu. ELAren iritziz, patronalaren proposamenaren «balizko edukiek» ez dute akordiorako «inolako borondaterik» erakusten sektorean lan baldintzak hobetzearen alde.

ELAk lan baldintzak «hobetuko» dituen eta langileen erosteko ahalmena «bermatuko duen» hitzarmen bat galdegin du, eta  Arabako erakundeen «inplikaziorik eza» salatu. Sindikatuak azpimarratu du gaur egungo lan baldintzek «prekarizazioa» sakontzen dutela sektore feminizatu horretan, zeinetan langile asko «emakume arrazializatuak» diren.

Horiek horrela, lan baldintza duinak lortzeko «bide bakarra» mobilizazioa dela berretsi du ELAk. Horregatik, sindikatuak ohartarazi du datozen aste eta hilabeteetan «areagotu» egingo dituztela protestak eta presio neurriak baldin eta patronalak eta erakundeek erantzun «egokirik» ematen ez badute.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA