Tokiko administrazioarekin euskaraz aritzea EAEko biztanle guztiek bermatuta eduki beharko luketen eskubide bat da, legeak hala onartua. Egiatan, ordea, hori sarri ez da betetzen, administrazioan izapideak egin dituen orok jakingo duenez. Badira, baina, eskubide hori egikaritzeko pausoak ematen ari diren erakundeak, eta horietako bat da Oiongo Udala (Araba). Gaurtik aurrera «euskara hutsezko arreta» bermatuko duela adierazi du, hain zuzen ere, Arabako Errioxako udal horrek.
Errolda eta erregistro eskaerak, administrazio izapideei buruzko informazio eskaerak, kultura eta kirol jarduerei buruzko kontsultak... Herritarrek «izapide eta kontsulta guztiak» euskaraz egin ahal izatea bermatuko dutela ziurtatu du udalak, euskararen normalizazioan «urrats sendoak» egiteko asmoa baitu. Euskarazko arreta telefono bidez zein aurrez aurreko bermatuko dutela ere ziurtatu dute.
