Berritze lanak bukatuta, astelehenean egongo da erabilgarri Bediako geltokia, Bilbo eta Donostia arteko Euskotrenen linean. Lehengoaren aldean, «seguruagoa eta erosoagoa» izango da, Susana Garcia Chueca Eusko Jaurlaritzako Mugikortasun Jasangarrirako sailburuak adierazi duenez. Bidaiarientzako atondo bat eraiki dute. Nasen arteko trenbide pasagunearen ordez, pasabide goratu bat jarri dute, eta hara igotzeko igogailuak. Nasetako aterpeak ere berritu dituzte, eta argiztapena hobetu. Ia hiru miloi euroko inbertsioa egin du Eusko Jaurlaritzak.
Garraio publikoaren erabilera sustatzeko, inguruko herrietako bizilagunentzako aparkaleku bat ere egin dute; besteak beste, Lemoako eta Usansoloko herritarrei trena hartzera joatea erraztuko die. 2.150 metro karratuko eremuan, 43 ibilgailurentzako lekua atondu dute. Horietatik bi auto elektrikoak kargatzeko prestatu dituzte, eta beste bi mugikortasun urria duten pertsonek aparkatzeko izango dira. Bizikletak aparkatzeko gune bat ere badago.
Bidaiarientzako eraikinak 110 metro koadroko solairu bakarra du, hiru eremutan banatuta: atari nagusia erdian eta bederatzi metro koadroko gela bana alboetan, Euskotreneko beharginentzat.
