Bilboren erdiguneko Moiua plazak egungo izena galduko du, eta Plaza Eliptikoa izango da bihartik aurrera. Memoria historikoari dagozkion arrazoiengatik hartu du erabakia Bilboko Udalak, hainbat entitateren eskaera aintzat hartuta —besteak beste EH Bilduk eskatu izan du aldatzeko—.
Erlazionatuta
Federico Moiua hiriko alkate izandakoa (Bilbo, 1873-1939) «bi diktadurarekin» erlazionatuta dago, Juan Mari Aburto oraingo alkateak esplikatu duenez plazan bertan egindako agerraldian, gaur goizean: Miguel Primo de Riveraren diktaduran izendatu zuten alkate Moiua, 1924an, eta «demokratikoki hautatutakoa» kargutik kendu, Ernesto Erkoreka; hamar urteren ondoren, frankistek aintzatetsi egin zuten haren figura, Bilbo hartu eta gutxira plaza berrizendatzean. 1937an, hiriko lehen alkate frankistak, Jose Maria Areilzak, Moyua izena ipini zion ordura arte On Diego Lopez Harokoa deitutako plazari.
Bihar bertan, plazako lau plakak izen berria erakutsiko dute: besteak beste, Carlton hotelaren fatxadan dagoenak eta Aurora eraikinekoak. Gainerako bide seinaleak, seinale turistikoak eta antzekoak, berriz, udal zerbitzuek edo dagokien entitateek erabakitzen dutenaren arabera eguneratuko dituzte. Horrez gain, metroko panelak ere moldatuz joango dira «poliki-poliki».
«Bilbotar askoren iruditerian beti izan da Plaza Eliptikoa», nabarmendu du Aburtok, «eta, bihartik aurrera, izendapen hori itzuliko diegu». Adierazi duenez, momentuz ez dira lantzen ari memoria historikoarekin loturiko beste izen aldaketarik.
