CCOOk eta Ascobi Bizkaiko eraikuntza patronalak sektoreko lan hitzarmena berritu dute hiru urterako (2025-2027). %3ko soldata igoera adostu dute aurtengorako eta KPI gehi %0,5 hurrengo bietarako. 33.000 langileri eragingo die. CCOOk bakarrik sinatu du, baina nahikoa da, %52ko ordezkaritza baitu.
Horrez gain, urtean egin beharreko lanorduak murriztea ere adostu dute. Datorren urtean 1.700 ordu egin beharko dituzte, eta 2027an lau ordu gutxiago. 2026ko lan egutegia finkatu dute: jaiegunak, zubiak eta konpentsazio egunak. Halaber, adostu dute enpresek zer ekarpen egingo dieten datozen hiru urteetan Etorkizuna BGAE Borondatezko Gizarte Aurreikuspeneko Erakundeari.
Beste sindikatuek akordioa kritikatu dute. ELAk gogoratu du eraikuntza sektorean lan istripu tasa handia dagoela, eta iruditzen zaio CCOOk eta patronalak ez dituztela kontuan hartu prebentzioaren arloko funtsezko gai asko. LABen ustez, ez dago akordioa beteko den bermerik, eta salatu du ezkutuan negoziatu dutela, langileen hitza aintzat hartu gabe.
