Iazkoa urte sagartsua izan zen, eta azken urteetako ekoizpenik oparoena izan dute Bizkaiko sagardogileek: 98.500 litro ekoitzi dituzte. Aurtengo sagardoa argiagoa da, eta haren freskotasuna, ahoan duen oreka eta intentsitate handiko aroma atsegina nabarmendu dituzte. Azidotasun bizia baina edangarria du, %6,2ko graduazioa, eta gorputz orekatua. Gaur egin dute lehen txotxa, Zornotzako Uxarte sagardotegian. Ekitaldian, Zornotzako La Revelia jatetxeko sukaldari Fernando Gonzalez izendatu dute sagardoaren lagun. La Reveliak Michelin izarra lortu zuen azken sariketan.
Jose Antonio Zamalloa sagardotegiko ugazaba ohi —ardura alaben esku utzi du oraintsu— eta Bizkaiko Sagardogileen Elkarteko presidenteak nabarmendu duenez, «sagardietan eta upategietan egindako lan onaren emaitza» da aurtengo «sagardo bikaina». Sei ekoizle daude herrialdean, eta tokiko sagarra baino ez dute erabiltzen. Horretarako, ezinbestekoa da Bizkaiko Sagardogileen Elkartearen eta Bialka Bizkaiko Frutazainen Elkartearen arteko elkarlana. Bialkak 40 ustiategi eta 74 sagardi hektarea ditu.
Zamalloaren esanetan, sagarraren kalitate onak lagundu du sagardo ona egiten. «Heldutasun optimoa izan du, eta sagarrak osasuntsu egon dira». Baldintza horiei esker, hartzidura orekatua izan da. «Sagardozaleek maila handiko produktua dastatuko dute», nabarmendu du. Bizkaiko sagardogileen buruaren esanetan, ezinbestekoa da eredu errentagarri eta jasangarri batera jotzea. Jauzi hori sagardietan, sagardoa ekoizteko prozesuan eta sagardotegietako jardunean egin behar dela deritzo. Era berean, kontsumitzaileen babesa eta konfiantza funtsezkotzat jo ditu, «lurraldeari, tradizioari eta sektorearen etorkizunari lotutako produktu baten alde» egiteko.
Sagardoa tradizioari lotuta dago, baina ekoizleek modernotasuna ere eman gura diote. Horregatik, Bizkaiko ekoizleak sagardo mota berriak lantzen ari dira: izotz sagardoa eta graduazio handiko sagardoa, berbarako. Uxarte sagardotegian bertan eta Bizkaiko Foru Aldundiak Zallan duen upategi esperimentalean ari dira probak egiten. Izotz sagardoa izoztutako sagarraren muztio kontzentratua hartzituz lortzen da, eta %11ko graduazioa du. Sagar zukua izoztuta erauzten da, eta horrek aroma eta azukre kontzentrazio handiko edari bat lortzen laguntzen du. Graduazio handiko sagardo naturala, berriz, lehorra da, apur bat mingotsa, eta usain txigortuak ditu. Izotz sagardoa lortzeko prozesutik abiatuta egiten da: muztioaren parte bat erabiltzen da graduazio handiko sagardoa egiteko.
