Sollube Gane eta Jata Gane parke eolikoen bultzatzaileak, Arena Power enpresak, uko egin die proiektu biei, Eusko Jaurlaritzak jakinarazi duenez. Enpresak jakinarazi dio ez duela baimena lortzeko prozedurekin jarraitu gura. Eta ez da halakorik gertatzen den lehen aldia: aurretik ere beste enpresa batek izan zuen Solluben eta Jatan aerosorgailuak ipintzeko proiektua.
Arena Power enpresak 31 milioi euroren inbertsioa egiteko asmoa zuen Jata mendian, bost aerosorgailu jartzeko. Ondoren, Jatabe, Mungia, Gatika eta Derio zeharkatuta, Zamudioko parke teknologikora eroan nahi zuten argindarra. Leku berera eroan nahi zuten Solluben sortutako argindarra ere. Sollube Gane proiektuan, sei aerosorgailu ipintzea zen asmoa, Bermeo, Meñaka eta Arrietako lurretan, eta kasu horretan 37 milioi euroko inbertsioa egin beharra zegoen. Proiektu horren ebakuazio linea Mungia, Fruiz eta Gamiz-Fika zeharkatzekoa zen parke teknologikora ailegatu aurretik.
Eskualdean ezinegona sortu zuten proiektu biek, eta Uribeko Mendiak Jagon plataformak eta inguruko herrietako udal eta alderdi politikoek milaka alegazio aurkeztu zizkieten. «Energia berriztagarrien alde gaude, baina tokian-tokian sortutakoa eta kontsumitutakoa bada, energia kooperatibei lotutakoa. Ez zaigu gustatzen megaproiektuen eredu hau», adierazi du plataformako kide Joseba Sarasolak. Izan ere, Uribeko Mendiak Jagon taldeko kideek uste dute proiektu guztiek parke eoliko erraldoi bakar bat osatzen zutela.
