Orioko itsaso aldeko portuan erdi hondoratuta jarraitzen du irailaren 24an su hartu zuen Gure Gaskuña itsasontziak. Ondarroakoa (Bizkaia) da hori, eta erre zen unean gasolioa zeraman. Hala ere, Eusko Jaurlaritzak ostiralean jakinarazi zuenez, amaitu dituzte ontzitik erregaia erauzteko lanak. Guztira 18.900 litro gasolio atera dituzte. Orain, itsasontzia erretiratzeko haren jabeak aurkezturiko plana aztertzen ari da Jaurlaritza.
Erregai guztia erauztea «urrats garrantzitsua» izan dela nabarmendu du Eusko Jaurlaritzako Portuen, Itsas Gaien eta Itsasertzeen zuzendari Koldo Goitiak. Itsasoa kutsatzea saihesteko prebentzio neurriak hartu dituzte, eta emango duten hurrengo urratsa itsasontzia erretiratzea izango da. Goitiak dio «ahalik eta azkarren» emango dutela erantzuna.
«Gure helburua da lanak beharrezko segurtasun berme guztiekin eta ingurunea babestuz egitea», adierazi du Goitiak. Hala ere, azken egunetan oriotarrak kexu agertu dira, suteak utzitako ondorioengatik eta egin den kudeaketagatik.
Elkarretaratzea larunbatean
Pasa den asteazkenean, Orioko Udalak eskatu zion Eusko Jaurlaritzari «lehenbailehen» konpontzeko Gure Gaskuña itsasontziaren egoera. Larunbatean, berriz, Orioko surf taldeak elkarretaratze bat antolatu zuen, eta eskaera berbera egin zuten.
«Itsasontziak hemen jarraitzen du sei aste igaro ondoren, eta isuriak izan dira azken astean. Gasolio kirats eta orban artean ibili behar izan dugu surf egiten dugunok, bainatzera etorri direnek, eta urpeko arrantza egin dutenek». Hori esan zuen Orioko surf taldeko ordezkari batek. Horrez gain, nabarmendu zuten egoera ezin dela gehiago luzatu, eta urak garbi nahi nahi dituztela «lehenbailehen».
Surf taldeko kideen ustez, arduradunek kudeaketa hobea eta azkarragoa egin zezaketen. Isurien inguruan Eusko Jaurlaritzak ezer esan ez izanagatik ere kritiko agertu ziren. Dena den, azaldu zuten elkarretaratzea ez zela errudunak bilatzeko, egoera konpondu behar dutenei ardura eskatzeko baizik.
