Donostiako Udalak Etxebizitzaren Behatokia sortu du, Jon Insausti alkatearen hitzetan «hiriko etxebizitza premien benetako erradiografia lortzeko» eta «donostiarren etxebizitza arazoari erantzun zehatzak emateko neurriak proposatzeko» asmoz. Alkateak gaur egin du Etxebizitza Behatokia aurkezteko agerraldia, eta esan du «kudeaketa ona diagnostiko egokian oinarritu dadin» sortu dutela. «Helburua da irudimen eta proposamen lana sustatzea neurriak identifikatzeko eta araudia herritarren beharretara egokitzeko».
Insaustik dio udalak «bizkortu» egin dituela dagoeneko martxan diren hainbat hirigintza proiektu, eta «Altza Berri auzoaren aldeko apustua» ere egin duela, Donostian beste 10.000 etxebizitza egon daitezen datozen urteetan. Nolanahi ere, uste du «eraikita dagoen hirian» ere jardun behar duela udalak: «Ez dugu ahaztu behar azken hamar urteetan etxebizitza berrien %20 erabilera aldaketei eta bereizketei esker sortu direla. Tresna horiez gain, berrikuntza, kudeaketa modu berriak eta esperientzia alternatiboak behar ditugu eraikita dagoen hiria aprobetxatzeko».
Hain zuzen ere, alkateak kontatu du Behatokiak bitan edo gehiagotan banatu daitezkeen hainbat pisu identifikatu dituela, 130 metro koadrotik gorakoak. «Banaketarako gutxieneko tamaina murriztea erabakiko balitz, etxebizitza gehiago sortzeko aukerak asko handituko lirateke, betiere, jabearen nahia higiezinaren beraren mugak, komunitatearen baimena eta bestelako baldintza batzuk errespetatuz».
Etxebizitza Behatokiak aztertutakoaren arabera, 35 metro koadrotik gorako beheko solairuko lokal ugari daude hirian, eta asko eta asko ez dira erabiltzen. Hain justu, halakoak etxebizitza bihurtzea proposatzen du Behatokiak, bai eta etxebizitza hutsetan esku hartzea ere. «Egitasmo edo programa gehiago bultza litezke etxebizitza hutsak ahalik eta gehien murrizteko», esan du Insaustik.
Pisu eta eraikin hutsak
Etxebizitza hutsak ez ezik, eraikin hutsak ere identifikatu ditu Behatokiak, eta Insaustik esan du hiriak behar duen erabilera eman dakiekeela halakoei: «Askotariko egoitza edo bizitokiak sor daitezke: adinekoentzako eta ikasleentzako egoitzak, langileentzako bizitokiak edo bestelako bizitoki alternatiboak».
Eraikigarritasun muga dela-eta «aprobetxatuta ez dauden eremu hutsak» ere detektatu ditu Etxebizitza Behatokiak, hala nola Intxaurrondoko, Aieteko, Antiguako, Egiako eta Loiolako zenbait arkupe. Behatokiaren azterketaren arabera, esparru horiek hutsik daude eraiki zirenetik. «Eraikigarritasun handiagoa emango balitzaie, eremu huts horiek etxebizitza bihur litezke», esan du alkateak.
Hortaz, Etxebizitza Behatokia datuak biltzen ari da orain, eta Donostiako alkateak dio «etxebizitza kopurua areagotzeko aukerak aztertzeko» balioko diela horrek.
