Ekinbide interaktibo bat jarri du martxan Kutxa fundazioak hilabete honetan, bi helburu nagusirekin: fundazioak Gipuzkoan egiten duen jardueraren eragina herritarrei hurbiltzea, eta lurraldean «garapen kulturalari, hezitzaileari eta sozialari» egiten dion ekarpena «modu nabarmenean» erakustea. Sortu duten ekinbidea joko digital bat da, eta bi irudiren artean dauden ezberdintasunak aurkitzean datza. «Hainbat erronkaren bitartez, parte hartzaileek haien ingurunean ezberdintasuna markatzen duten elementuak identifikatu beharko dituzte, eta, aldi berean, Kutxa fundazioak Gipuzkoan uzten duen arrastoaren adibide zehatzak aurkitu beharko dituzte», azaldu du erakundeak.
Sortu duten jokoa «jakin-minean» oinarritzen dela dio fundazioak. Memoria digital interaktibo bat agertzen da bertan, eta memoria horretan fundazioak duen eragina azaltzen da, hainbat daturen bitartez. Izan ere, benetako adibideak eta datuak ematen dituzte, eta horien bitartez erakusten dute fundazioaren jarduerak «ezagutza sortzen, kulturarako sarbidea zabaltzen eta gipuzkoarrentzako aukerak sustatzen» laguntzen duela.
«Proposamenak gonbidatzen du jakitera fundazioa milaka pertsonaren eguneroko bizitzaren parte diren ekinbide eta espazio ugariren atzean dagoela, nahiz eta fundazioaren ekarpena ezin den beti lehen begiratuan ikusi», adierazi du Kutxa fundazioak. Jokoa egiten dutenek, zozketa batean parte hartzeko aukera izango dute: bi lagunentzako Michelin esperientzia gastronomiko batean.
Gipuzkoan sendotu
Kutxa fundazioak azpimarratu du «sendotu» egin duela «Gipuzkoaren eraldaketan eragile giltzarri gisa» duen zeregina, «kultura, ezagutza, berrikuntza, iraunkortasuna eta gizarte kohesioa» uztartzen dituen jarduera eredu baten bitartez. Fundazioak dio aipaturiko arlo horietan ekinbideak egiten dituela, «lurraldea eraldatzeko» eta «pertsonen bizitza hobetzeko» helburuekin.
«Gure lana ulertzen dugu Gipuzkoa bidezkoagoa, sortzaileagoa, kultuagoa eta jasangarriagoa eraikitzera bideratutako eraldaketa tresna gisa». Hori adierazi du Kutxa fundazioko zuzendari nagusi Ander Aizpuruak. Horrez gain, fundazioak nabarmendu du gaur egungo «erronka nagusiei» erantzutea helburu duten programa «ugari» garatzen dituztela, herritarren, enpresen eta erakundeen parte hartzea sustatuz. «Eredu integral horrek inbertsio estrategikoa, gizarte ekintza eta dinamizazio kulturala uztartzen ditu, lurraldearen oraingo ongizatea eta etorkizuna bultzatzen dituen ekosistema bat sendotuz», gehitu dute.
Beste ekinbide interaktibo bat ere egin du Kutxa fundazioak; izan ere, hamahiru «gako» aukeratu dituzte, fundazioaren jarduerak duen eragina azaltzeko. Gako horietako bati «memoria bizia» deitu diote. Erakundeak azaldu du Gipuzkoako ondare bisuala zaintzen duela bere fototekaren bitartez, eta online eskuratu daitezkeen bi milioi argazki baino gehiago eta 600.000 irudi digitalizatu baino gehiago dituztela. Beste gako bati «jakintza bizitza osorako da» deitu diote. Erakundeak nabarmendu du egin duten dibulgazio jarduerak hiru milioi lagunetik gora bildu dituela, eta, besteak beste, 50.000 tailer eta 18.000 jarduera zientifiko egin dituztela.
