Frantziako Estatuaren meneko nazio zapalduetako ordezkaritza batek babesa adierazi die heldu den ostegunean Baionako auzitegian epaituko dituzten EHE Euskal Herrian Euskaraz taldeko lau kideei, eta aldarrikatu dute epaitegietan «jatorrizko hizkuntzan» aritzeko eskubidea. Elkarretaratzea eginen dute, bihar, 12:00etan, Pirinio Atlantikoetako departamenduak Baionan duen egoitzaren aitzinean, EHEk deituta.
Izan ere, instituzio horren egoitzaren kontra pintaketa bat egiten ari zirela atxilotu zituzten EHEko lau kideak irailean. EEP Euskararen Erakunde Publikoaren aitzinkontuaren inguruko eztabaidaren harira egin zuten ekintza. «Gutxiengo egoeratik ateratzeko euskarak behar duen diru kopuruari begira Frantziako instituzio politikoetako agintariek ematen dutena ez da batere aski», berretsi zuen atzo ere auzipetuetako bat den Gorka Torre EHEko kideak.
Baionan egin zuten agerraldian, Bretainiako, Korsikako, Okzitaniako eta Ipar Kataluniako ordezkariak bildu zituzten, eta adierazpen bateratua irakurri zuten, bost hizkuntzatan, salatzeko epaitegietan frantsesa inposatzea «bidegabekeria» dela. «Frantziako Estatuko agintariek gutxitutako jatorrizko hizkuntzen hiztunentzat ez da hizkuntza justiziarik, zeren justizia, giza duintasuna errespetatzea da eta pertsona guziak berdintasunez tratatzea da». Halaber, Frantziako konstituzioa «bidegabea, zapaltzailea eta linguizida» dela adierazi zuten.
Nazio zapalduetako ordezkariek, epaitegietan ez ezik, bakoitzak bere lurraldean ere jatorrizko hizkuntzan mintzatzeko duen eskubidea errespetatzeko eskatu zuten.
Euskaraz, edo ospa
Ez da lehen aldia EHEko kideek epaitegian euskaraz aritzea eskatzen dutela. Azkenaldian, arlo anitzetako 17 auzipeturi ukatu diete eskubide hori. Osteguneko auzi saioan, euskaraz aritzeko eskubidea aldarrikatuko dutela berretsi zuen Torrek. «Ukatzen badigute, ez dugu parte hartuko».
