Orain dela bi urte hasi zuten Seaskak eta UEUk lankidetza, ikasleen euskalduntzean eragiteko asmoz, eta ari da emaitzak ematen. Euskara ikasgaiaren programatzea landu dute elkarrekin, euskal curriculuma oinarri. Haren araberako ebaluazioak ere landu dituzte. Iazko udaberrian «euskal brebeta» pasatu zuten kolegio bukaerara iritsi ziren ikasleek, eta iragarri dute 2027rako «euskal baxoa» prestatzen ari direla.
Egoitz Urrutikoetxea Seaskako hezkuntza zuzendariaren hitzetan, ikastoletan ez zuten «berariaz programa esplizitaturik» Euskara ikasgairako. «Orain, gureak diren bost kolegioetan eduki eta programa berak landuko dituzte, eta ezagutza aukera berberak dituztela helduko dira kolegio bukaerara». Funtsean, hizkuntza nagusi baten maila ematea izan da helburua: hainbat literatura obra landuko dituzte, baita Euskal Herriari buruzko edukiak ere, mundu ikuskera orokor bat izan dezaten. UEUren glotodidaktika sailarekin lan egin dute, B2 mailaren bermea izateko eta irakasleak prestatzeko.
Iazko udaberrian ikasleei ebaluaketa egin zieten kolegio bukaeran; «euskal brebeta», funtsean. 234 ikaslek pasa zuten azterketa, eta %82k gainditu zuten B2 maila. Ondoko urteetan, idatzizko probari ahozkoa ere erantsiko diote.
Eta kolegioan abiatutako lana lizeoraino eramatea da Seaskaren asmoa. «Euskal baxoa» sortzea da ondoko urteetarako duten erronka nagusietako bat, ikastolan egindako ibilbidearen balidazio gisara balio dezan. Metatu duten jakintza baieztatzeko ez ezik, hizkuntza egiaztapenerako ere balioko du; B2 eta C1 mailak zertifikatu nahi dituzte. Hori kausitzeko, beste instituzio batzuekin ere elkarlanean ari dira. 2027rako prest egotea nahiko lukete.
Hitzaldi zikloa
Jakinarazi dutenez, ikastoletarako programazioan egin duten edukien lanketa guztia Ipar Euskal Herrian euskarazko irakaskuntzan ari diren irakasleen esku utziko dute, bai sare publikoko irakasleen esku, bai sare pribatuan aritzen direnen esku. Horrez gain, antolatzen dituzten formazioetara ere gomitatu dituzte beste sareetako irakasle eta gurasoak.
Helburu hori du, hala nola, aurten abiatu duten Har(h)itza hitzaldi zikloa: egunerokoan euskara erabiltzean diren zailtasunez eta indarguneez gogoetatzea, hain zuzen ere. Berriki egin dute lehen aurkezpena, Euskarabenturako esperientziari buruz; martxoan inklusioari buruz ariko dira, eta ekainean elebitasunari buruz.
