Euskal Herriko Mendi Duatloien Zirkuituak (EHMDZ) erdibidea egin du jada: larunbat arratsaldean jokatu zen Aian (Gipuzkoa) bosgarren proba, eta beste lau geratzen dira orain. Aiakoan, aurten zirkuituan lehen aldiz aritu diren bi duatloilari gailendu ziren: Ainhoa Urteaga zumaiarra (Gipuzkoa) eta Eneit Bertiz sunbildarra (Nafarroa). Iaz baino partaide gutxiago izan zen Aiako seigarren mendi duatloian: 25 kirolari banaka eta 14 errelebokako proban, 53 guztira. Ibilbide azkarra prestatu zuten Aian, bi sektoretan banatuta: lehenbizi sei kilometro korrika (275 m+), eta ondoren 13,2 kilometro bizikletan (642 m).
Emakumezkoetan, korrikako saioan, elkarrekin joan ziren denbora askoan Maite Murgia lazkaotarra (Gipuzkoa), Izarne Maioz asteasuarra (Gipuzkoa) eta Ainhoa Urteaga. Azken aldera, Murgiak 48 segundoren aldea lortu zuen, baina ez zen nahikoa izan mendiko bizikletako saioan Urteagari aurre egiteko. Bi gurpilen gainean, zumaiarrak ia hiru minutuko tartea lortu zuen, eta garaile gurutzatu zuen Andatzako plazako helmuga. Urteagak, gainera, gurpila luzatuta bukatu zuen mendiko bizikletako saioa. Bigarren Maite Murgia izan zen bigarren, eta Izarne Maioz hirugarren.
Gizonezkoetan, Eneit Bertiz hasieratik aurreratu zen, eta hala korrika nola bizikletan bera izan zen azkarrena. Eneko Gurrutxaga amasarra (Gipuzkoa) izan zen bigarren, ia lau minutura, eta Aitor San Sebastian zizurkildarra (Gipuzkoa) hirugarren, bost minutu pasatxora.
Erreleboka hamahiru bikote aritu ziren, eta ez zen bikote mistorik izan. Unai Altuna eta Haritz Artano izan ziren garaile. Iñigo Eizagirre eta Mikel Usandizaga bigarren, eta Alberto Gomez del Rio eta Eneko Gonzalez hirugarren.
Sailkapenak, Euskadiko Triatloi Federazioaren esteka honetan.
Lau proba geratzen dira 2026ko EHMDZ bukatzeko. Hurrengo mendi duatloia larunbat honetan izango da, Ibarran. Azaroaren 14an Idiazabalen (Gipuzkoa) izango da zazpigarrena; Euskal Herriko Txapelketa izango da, gainera, Idiazabalgoa. Azaroaren 21ean Bidania-Goiazko (Gipuzkoa) lehen mendi duatloia jokatuko da, eta azaroaren 28an izango da Adunako (Gipuzkoa) azkena, ohiko sagardotegiarekin eta amaierako festarekin.
