Asteburu honetan bukatu da Koper hirian (Eslovenia) Kirol Eskaladako Munduko Kopa zailtasuneko modalitatean. Sei proba izan dira guztira, eta erregularrenak izan dira irabazle: Erin McNeice britainiarra eta Alberto Gines espainiarra. Koperreko proban, nesketan, etxeko idoloa gailendu da, Janja Garnbret, esloveniar guztien gozagarri. Mutiletan, berriz, Sorato Anraku japoniarra izan da irabazle.
Erin McNeice britainiarra indartsu hasi zen Munduko Kopan, irabazle izan zen lehen bi probetan, Wujiangen (Txina) eta Balin (Indonesia), eta, hein handi batean, garaipen horiei esker izan da Munduko Kopan ere txapeldun, hurrengoetan tartea higatuz joan baitzaio Chaehyun Seo korearra, eta asko gerturatu zaio azkenerako. Innsbrucken (Austria) hirugarren izan zen, Chamonixen (Frantzia) hirugarren, Madrilen (Espainia) laugarren, eta Koperren ere laugarren izan da asteburuan.
Munduko Kopako podiumean, Chaehyun Seo izan da bigarren, eta Laura Rogora italiarra hirugarren.
Gizonezkoetan, Alberto Gines oso erregularra izan da denboraldi osoan: espainiarra podiumean izan da sei probetan, hirutan bigarren koskan eta beste hirutan, hirugarrenean. Agian garaipen baten distira falta izan zaio, baina Munduko Kopan lortutako garaipena bera da, finean, garrantzitsuena. Koperreko probako podiumean, Kopako aurreko bi txapeldunak izan ditu ondoan: Sorato Anraku japoniarra izan da irabazle, eta Toby Roberts britainiarra hirugarren.
Koperreko azken proba horretan, Ginesek ondo kudeatu du aurkarien presioa. Munduko Kopako sailkapen nagusian, bi japoniar izan ditu ondoan: Sorato Anraku bigarren, eta Satone Yoshida hirugarren.
Mikel Linazisoro Europan jokatu diren probetan lehiatu da Munduko Kopan, eta 70. izan da sailkapen nagusian.
Emaitza guztiak, IFSC-ren webgunean.
