Abiatu da 2026ko Euskal Herriko Mendi Duatloien Zirkuitua (EHMDZ), 16. ekitaldia aurten. Guztira bederatzi lasterketa izango dira, eta aurreko larunbatean Asteasun (Gipuzkoa) jokatutakoa izan zen lehenbizikoa. Iaz sartu zen Asteasuko proba Euskal Herriko Mendi Duatloien Zirkuituan, eta, joan den urtean bezala, egutegiko estrainekoa izan da aurten ere. Guztira 81 kirolari lehiatu ziren: 39 banakako modalitatean eta 42 bikoteka. Errelebokako modalitate horretan, lau izan ziren bikote mistoak. Eguraldi eguzkitsua izan zuten larunbat arratsaldean Asteasun, eta tenperatura altu samarrak aukeran.
Emakumezkoetan, banaka, hiru lehiakide baino ez ziren izan, hirurak gipuzkoarrak, eta horien artean Magali Albisu oiartzuarra izan zen irabazle. Korrikako lehen tartean, Maite Murgia lazkaotarra izan zen azkarrena, Izarne Mayoz asteasuarra bigarren eta Magali Albisu hirugarren. Mendiko bizikletan, ordea, Albisuk espezialista handia dela erakutsi zuen, eta korrika galdutako denbora berreskuratzeaz gain, tarte zabala atera zien bi lehiakideei. Albisuren denbora: 2.02.35. Bigarren Izarne Mayoz izan zen (2.11.38) eta hirugarren Maite Murgia (2.15.54).
Mutiletan, Eneko Gurrutxaga amasarrak lortu zuen garaipena, eta hor ere gipuzkoarrak ibili ziren lehen postuetako lehian. Korrikako saioan, Asier Aburuza adunarrak egin zuen denbora onena, baina oso gertu izan zituen Aitor San Sebastian zizurkildarra eta Eneko Gurrutxaga bera. Mendiko bizikletako saioa hartu orduko, ordea, Gurrutxagak diziplina horretan espezialista handia dela erakutsi zuen, eta aldea atera zien aurkariei. Bi gurpilen gaineko saioan, dena den, Endika Mantecon segurarra izan zen azkarrena. Bi sektoreetako denborak batuta, Eneko Gurrutxaga izan zen irabazle (1.29.58), Endika Mantecon bigarren (1.30.43) eta Aitor San Sebastian hirugarren (1.31.37).
Horrenbestez, Gurrutxagak 2026ko zirkuitua irabazteko hautagai sendoa dela agertu zuen Asteasun. Amasarrak hiru aldiz jantzi du txapela, azkena 2024an.
Erreleboka, Iban Goikoetxea eta Ekhi Aierbe ataundarrak (Gipuzkoa) izan ziren irabazle, Aitor Zuriarrain eta Adei Zuriarrain idiazabaldarrak (Gipuzkoa) bigarren, eta Jon Flores eta Alex Gaztañeta herritarrak hirugarren. Bikote mistoen artean, berriz, Ane Galartza (Zizurkil) eta Enaitz Roteta (Asteasu) izan ziren azkarrenak, Elixabet Mendizabal eta Jokin Alberdi bigarren eta Irati eta Mikel Insausti anai-arrebak hirugarren.
Sailkapen guztiak, Triatloi Federazioaren esteka honetan.
Zirkuituko bigarren proba datorren larunbatean, irailak 26, izango da Zarautzen, Zarauzko Triatloi Elkarteak antolatuta. Zarauzko mendi duatloia aurten batu da EHMDZko egutegira, eta Gran Camping Zarautz, gainera, zirkuituaren babesle nagusia izango da 2026an. Hala, Talai Mendi muinoaren eta kanpinaren inguruetan egingo da duatloia. Izena emateko epea irekita dago oraindik, esteka honetan.
