Crodo herriko (Italia) harrobi zahar bat, zain beltzak harri grisaxka ebakitzen, arrakala perfektu bat eta eskalatzaile bat —Fred Moix— gorputz egokiera ezin hobean, bere artelana gauzatzen. Michelangelo izenburua eman dio Rainer Eder argazkilari suitzarrak bere obrari, eta horrekin irabazi du aurten CVCEPHOTO nazioarteko lehiaketako sari nagusia. «Lehen aldiz toki hori ikusi nuenean, berehala konturatu nintzen argazkiak ateratzeko leku berezia zela. Urruneko muino batean jarri, eta teleobjektiboarekin atera nuen argazkia», azaldu du Rainerrek.
Bihar egingo dute nazioarteko argazki lehiaketa entzutetsu horren sari banaketa, Euskal Mendizaletasunaren 29. Galaren barnean. Aldapeta Maria ikastetxeko auditoriumean izango da ekitaldia, 18:30etik aurrera. Donostiako Club Vasco de Camping elkarteak berak antolatu du gala, bere 75. urteurreneko ekitaldien artean.
Bigarren saria Italiako Alex Wides argazkilariarentzat izan da, Climbing (Eskalatzen) irudiarengatik. Konposizio konplexu eta landua da: hainbat argazki elkartuta 360 graduko panoramika harrigarri bat sortu du egileak. Emaitza: Patagoniako mendiguneek eta haranek inguratzen duten Cerro Chalten edo Fitz Roy mendia, berez den baino kasik ikusgarriago.
Hirugarren saria Patricia Valerorentzat izan da, Bailando en el río (Errekan dantzatzen) argazkiarengatik. Irudia Valsain herrian (Segovia, Espainia) atera zuen, eta bloke eskaladaren dinamismoa eta errekako uraren leuntasuna uztartzen ditu. «Ibaiaren barruan tripode bat jarri, eta flasharen bidez eskalatzailea argitu nuen. Meritu guztia Guillerena da, zenbait segundoz eutsi baitzion posturari, efektua lortzeko», azaldu du egileak. Epaimahaiak bereziki baloratu du irudiak sortzen duen giroa, basoko txoko batean; «izan ere, lasaitasuna transmititzen du, eta ez eskaladako irudietan ohikoa izaten den adrenalina eta mugimendua».
Sari bereziak
Aipatutako sari nagusiez gain, urtero hainbat sari berezi ere izaten dira lehiaketa horretan. Euskal Herriko Argazkirik Onenaren EITB Sari Berezia, aurten, Aritz Gordorentzat izan da, Neguko oreka lanagatik. Irudia Buetraitz mendiaren magalean atera zuen (Aizkorri-Aratz parke naturala), elur jasa handi baten ostean. Argazkian, Markel Uriarte txirrindularia ageri da pinu elurtuen artean, simetria perfektuaren eta isiltasun zuriaren erdian.
BBK Mendi Film Bilbao-Bizkaia zinemaldiaren urteko kartela ere lehiaketa honetatik sortzen da. Aurten, sari berezi hori Julia Roger Veyerrentzat izan da, The Cave (Haitzuloa) lanagatik. Irudia Chamonixeko Mer de Glace glaziarrean dagoen izotz naturaleko kobazulo batean atera zuen. Egileak izotzezko paisaia efimeroak esploratzen ditu, haien argi aldakorrek eta ozeanoen antzeko atmosferak erakarrita. «Izotzak liluratu egiten nau: haren itxura aldatu egiten da argiaren eta urtaroaren arabera, eta paleta desberdin bat sortzen da beti», azaldu du argazkilari frantziarrak. 2025a glaziarren urtea den heinean, arriskuan dagoen ondare natural horren ikono bilaka daiteke irudi hau.
Sari nagusiez gain, epaimahaiak hamabost ohorezko aipamen egin dizkie munduko hainbat lekutako egileek aurkeztutako argazkiei, haien originaltasuna, konposizioa eta indar bisuala aintzat hartuta.
Lehiaketako argazki guztien galeria ikusgai dago CVCPHOTO lehiaketaren webgunean.
