Nahia Pikabea beratarrak (Nafarroa) eta Xabier Sanchez idiazabaldarrak (Gipuzkoa) irabazi zuten, joan den larunbatean, Agerrako Kroseko 43. ekitaldia, Luis Mari Apeztegiaren Oroimenezkoa. Beran jokatzen da, eta, maila guztiak kontuan hartuta, 150 korrikalarik baino gehiagok parte hartu zuten lasterketetan.
Lasterkariek 5,8 kilometroko ibilbidea osatu behar zuten. Emakumezkoetan, Pikabeak 24 minutu eta 57 segundo behar izan zituen ibilbidea osatzeko. Mireia Ostiz izan zen bigarren —emakumezkoetan lehen beteranoa— eta Teresa Igoa hirugarren.
Gizonezkoetan, Sanchezek 19 minutu eta 57 segundo behar izan zituen ibilbidea osatzeko, eta iazko garaipena berritu zuen. Gwendal Larque beratarra izan zen bigarren, eta Hodei Lujanbio goizuetarra hirugarren.
Beteranoetan, Ainara Mendiburu doneztebarra (30.15) eta Hodei Lujanbio (20.31) izan ziren irabazleak.
Bortzirietako III. Kopako laugarren proba izan zen Agerrako Herri Krosa. Orain arteko emaitzak kontuan izanda, Ane Elzaurdia eta Gwendal Larque beratarrak dira Kopako liderrak. Zirkuitua urriaren 24an amaituko da, Lizuniagako Igoerarekin.
