Mendiko eskiko Espainiako Txapelketak jokatu dira joan den asteburuan, Aramon Formigal-Panticosako eski estazioan (Aragoi, Espainia); larunbatean bertikala jokatu zuten, eta igandean, lineakoa. Euskal eskiatzaileetan, Uxue Loizu bikain aritu da: bertikalean eta distantziakoan, bietan bigarren izan da Iruñeko eskiatzailea. Bi probetan Ares Torra kataluniarrak irabazi du.
Espainiako Kopako azken proba puntuagarria ere bazen igandeko lineako lasterketa, eta, zortzi probetako emaitzak kontuan hartuta, Aitor Ugarte (Aramaio, Araba, 2002) bigarren izan da sailkapen nagusian.
Larunbateko bertikalean, eskiatzaileak estazioaren oinarritik abiatu ziren (1.150 metro), eta Puntal de los Petros eremura igo (1.850 metro). Ibilbideak 5.500 metroko luzera eta 760 metroko goranzko desnibela izan zuen. Ares Torra irabazleak 40.49.09ko denbora egin zuen, eta Uxue Loizuk minutu eta erdi eskas gehiago behar izan zuen (42.09.09). Claudia Gutierrez espainiarra izan zen hirugarren (43.00.09). Gizonezkoetan, Jordi Alis kataluniarra izan zen garaile (30.35.07).
Euskal ordezkariei dagokienez, nabarmentzekoa izan zen 23 urtez azpikoen mailan Jon Razkinek lortutako garaipena. Espainiako Kopako sailkapen nagusian hirugarren izan da Razkin. 16 urtez azpikoetan, Ane Rubio nafarra ere hirugarren izan zen; eta 14 urtez azpikoetan, Kai Lopez nafarra bigarren.
Igandean, lineako edo distantziako proban, 150 eskiatzaile lehiatu ziren, 1.500 metroko desnibeleko ibilbidean. Gaueko tenperatura hotzen ondorioz elur gogorra eduki zuten eskiatzaileek, eta horrek zaildu egin zituen jaitsierak, eta erorikoren bat edo beste ere eragin zuen. Lineako proban, Ares Torra eta Nil Cardona izan ziren garaile. Torraren atzetik, Uxue Loizu izan zen bigarren, eta Claudia Gutierrez hirugarren.
