Azpeitiko Udalak eta Euskal Mendizale Federazioak Joxe Urbieta Takolo mendizale azpeitiarraren oroimenezko beka emango dute aurten ere. 4.000 euroko beka da, eta gaurtik martxoaren 31ra aurkeztu ahal izango dira eskaerak.
Goi mendizaletasunarekin, abenturarekin, zientziarekin, esplorazioarekin eta dibulgazioarekin lotutako proiektuak bultzatzea da bekaren helburua. Atzo argitaratu zituzten 2026ko bekaren oinarriak Gipuzkoako Aldizkari Ofizialean (GAO), eta gaur zabaldu da eskaerak aurkezteko epea.
Aurreko urteetan bezala, batzorde tekniko bat sortuko da aurkeztutako proiektuak baloratzeko. Irizpide hauek hartuko dituzte kontuan: proiektuaren originaltasuna (%29 gehienez); proiektuaren zailtasuna (%29 gehienez); partaideak (%21 gehienez) —kontuan izango da euskal partaideen kopurua (%7); parekidetasuna (%7) eta Euskal Mendi Federakundearen edo Mendi eta Eskalada Kirolen Napar Federakundearen lizentzia izatea eskaera egin baino urte bat lehenago (%7)–—; jardueraren eta baliabideen finantzaketa (%21 gehienez); aurrekontua (%7); proiektuaren iraupena (%7) eta proiektua gauzatuko den lekua (%7).
Iazko beka Mikel Txintxurreta eta Imanol Muro donostiarrek irabazi zuten, Kirgizistanen eskalada bide berriak irekitzeko proiektuarekin. BERRIAk erreportaje honetan eman zuen bi gazteek egindako jardueraren berri.
