Peña Karria Arabako Valderejo parke naturalean dagoen mendi ikusgarria da, Burgos eta Araba arteko mugaldean. Burgosko Arroyo de San Zadornil abiapuntu hartuta, igotzen garen lekutik igota ere eskuak erabili beharko ditugu haren gailurreko ikusmira zoragarriaz gozatzeko. Hego-ekialdeko gandorrari dagokionez, ertzaren zeharkaldia edo eskalada zaila ez bada ere, etengabe izango dugu amildegi pikoa bi aldeetara. Izan ere, Euskal Herrian eskalatu daitezken gandorren artean ikusgarrienetakoa da Peña Karriakoa, ikusgarriena ez bada.
Gandorrari ekiteko, gehienez III zailtasuneko zatiak dituen hainbat punta eskalatuko ditugu. Metro hauetan gandorra pixkanaka zorroztuz doa, baita amildegia ere. Zati horren ondoren, gandorraren zatirik ikusgarrienari ekingo diogu. Gandorra erabat estutzen da, eta gero eta nabarmenagoa da amildegi ertzean gaudela. Zati honen amaieran, gandorraren pasagunerik zailena topatuko dugu: IV+ zailtasuneko arraila bat duen horma bertikal bat, iltze zahar batzuekin segurtatuta dagoena.
Pasagune zaila atzean utzita, III zailtasuneko tarte bat eskalatzen jarraitu dugu, kate eta parabolt batez segurtatutako 4-5 metroko rappel motz bat egingo dugu, eta III zailtasunera iritsiko ez den tximinia bat eskalatuz gailurrera iritsiko gara, bertaraino iristen den ohiko bidetik autora itzultzeko.
Gandorrak autobabeserako aukera handiak ematen ditu, eta nahikoa izango dugu 30 metroko soka bat, dozena erdi bat espres zinta, zinta-uztai batzuk eta friend gutxi batzuekin. Pasagunerik zailenaren oinean bilgune bat muntatzeko aukera ematen duten bi iltze topatuko ditugu, pasagune hori luze bat eginez eskalatu ahal izateko.
