Kosovorako Auzitegi Bereziak 25 urteko kartzela zigorra ezarri dio Hashim Thaci Kosovo Askatzeko Armadaren buru ohietako bati, Kosovoko gerran (1998-1999) gerran krimenak egitea egotzita. Epai hori kaleratu du gaur auzitegi horrek, Hagan (Herbehereak). Thaci Kosovoko presidentea izan zen (2016-2020), baita lehen ministroa ere (2008-2014). Hilketak, tortura eta, besteak beste, legez kanpoko atxiloketak leporatzen dizkiote Serbiako indarren aurkako gerran. Gizateriaren kontrako krimenengatik ere zegoen akusatuta, baina kasu horretan absolbitu egin dute
Charles Smith epaileak irakurri du sententzia Thaciren aurrean, eta hark isilik entzun du, zutik, aurikularrak belarrietan. Kargu guztiak ukatu ditu prozesuan zehar, eta azkeneko auzi saioan, joan den otsailean, nabarmendu zuen «Kosovoko herriaren ondoan» egon dela beti, eta «Mendebaldearen idealek» gidatu dutela bere egitekoa: «demokraziak, berdintasunak, eta justiziak». Haren defentsaren arabera, ez dago frogarik krimen horiek egozteko.
Ebazpenak dioenez, oposizioko 96 politikariren eta Serbiako indarren kolaboratzailetzat jotako pertsonen hilketaren erantzulea da. Gainera, beste hiru gerrillari ohi ere epaitu dituzte, eta hirurak zigortu: 25 urte Jakup Krasniqiri, hemezortzi Kadri Veseliri, eta hamahiru Rexhep Selimiri. Laurak 2020ko azarotik zeuden behin-behineko atxiloaldian, Hagan.
Erabakiak ikusmina piztu du Kosovon, eta milaka pertsona kalera atera dira Pristinan, plataforma baten bueltan bildutako hainbat elkartek deituta. Albaniarrek heroitzat dute Thaci. Pasa den larunbatean ere manifestazio masibo bat egin zuten hiriburuan —Askatasunaren aldeko martxa deitu zioten—, eta 100.000 lagun inguru bildu zituen.
Krisi instituzional betean
Epaia heldu da noiz eta krisi instituzional batean daudenean herrialdean. Urte eta erdian hirugarrenez hauteskunde parlamentarioak egin zituzten ekainaren 7an, VV Vetevendosje (Autodeterminazioa) nagusitu zen, eta Albin Kurti alderdi horretako liderra herrialdeko lehen ministro izendatu zuten aurreko igandean, laugarrenez.
53 aulki lortu zituen Vetevendosjek ekainean, baina beste batzuen babesa behar zuen Kurtik gobernuburu aukeratua izateko, Parlamentuan 61 eserleku behar baitira gehiengo osoa lortzeko. Eta gutxiengo ez serbiarrek babestu zuten: bosniarrek, turkiarrek, eta erromaniek.
Serbiarrek inbestidura saioan parte hartu zuten; ez, ordea, oposizioko indar nagusiek: PDK Kosovoko Alderdi Demokratikoa, LDK Kosovoko Liga Demokratikoa eta AAK Kosovoren Etorkizunerako Aliantza. Boikotatu egin zuten, argudiatuta prozedura konstituzioaren kontrakoa izatea. Haien arabera, Parlamentua osatzeko epea abuztuaren 7an iraungi zen. Gainera, Albulena Haxhiu behin-behineko presidenteari egotzi zioten prozesuari bide ematea, nahiz eta ganberako bost presidenteordeetako bat aukeratu gabe zegoen artean.
Oposizioak helegitea jarri du Auzitegi Konstituzionalean. Iaz, antzeko egoera batean, Konstituzionalak ebatzi zuen Parlamentua osatu behar zela, emaitzak ofizial egin ondorengo 30 eguneko epea. Epe hori abuztuaren 7an iraungi zen.
