AEBek familia bereko zortzi kide hil dituzte Iraken, aireko eraso batean

Zortzi zibil hil dituzte AEB Ameriketako Estatu Batuek Iraken, Dur herrixkan egindako aire erasoan.Biktimetako batek AlKaedarekin lotura zuela jakinarazi zuten AEB buru duten atzerriko tropek, hedabideetara atzo helarazitako adierazpen baten bidez. Hildakoen artean hiru emakume ere badaude. Eta gainontzeko biktimak «terroristak» ziren, bertsio ofizialaren arabera.

Irakeko poliziak izan ziren informazioa ematen lehenak.Iturri horien arabera, zortzi lagunak etxean zeudela eraso zieten AEBetako militarrek. Airetik tirokatu zituzten, helikoptero batetik. Horren aurretik, ordea,etxeko atea jo eta errenditzeko eskatu zioten soldaduek ustezko Al Kaedako kideari. Eta hura, amore eman beharrean, arma bat eskuan zuela atera zen militarren aurrera, betiere Irakeko polizien bertsioaren arabera. Orduan erabaki zuten AEBek etxebizitzari airetik tiro egitea. Operazioaren ondorioz, eraikinaren barruan zeuden guztiak hil ziren.

AEBek erasoa egin zuten herrixka, Dur, Ezzat Ibrahim al Duriren jaioterria da. Irak iparraldeko Tikrit hiriaren ondoan dago. Al Duri Saddam Husseinen bigarrena izan zen, hura Irakeko presidente zenean. Husseinen erregimena erori zenean, ihes egin zuen herrialdetik Al Durik. Eta, ordutik, AEBak Batzorde Iraultzaileko presidenteordea zena aurkitu nahian dabiltza. Ordainsaria ere eskaini dute, 25.000 dolarrekoa, aztarnaren bat ematen duenarentzat.

Tropen erretiratzea

Bestalde, Hego Koreak Iraken dituen tropak urte bukaera baino lehen erretiratuko ditu. Hala jakinarazi dute herrialde horretako Defentsa Ministerioko iturriek.Horrela, bertan behera lagako dute iazko abenduan legebiltzarrean adostutakoa. Orduan tropak denbora gehiagoan Iraken edukitzea erabaki zuten. Lau urte daramatzate Hego Koreako militarrak herrialdean, AEBen tropei babesa ematen. 2004an iritsi zen lehen misioa, 3.600 soldaduz osatua. Haietatik 520 baino ez dira geratzen egun.