Al Kaeda erakundeko ustezko 44 kide hil dituzte gaur Yemenen, Zinyibar hiritik gertu egoitza militar bat hartzeko egin duten ahaleginean.
Ostiralean hainbat eta hainbat ekintzailek Zinyibar hartu zutenetik, armada haien kontra ari da.
Sana hiriburuan, ospitaletako iturriek jakinarazi dutenez, gutxienez 40 lagun hil dira atzotik. Ali Abdula Sale presidentearen eta Sadeq Abdala al Ahmar liderraren aldekoen artean izan dira borroketan. Hainbat egun daramate bi alde horiek elkarren aurka, eta azken liskarrak atzo gauean hasi ziren.
Hildako gehienak gizonezkoak direla esan dute, eta armak zeramatzatela.
Siriako oposizioa Turkian bildu da demokraziarako bidea prestatzeko
Deserrian dagoen Siriako oposizioa Antalian bildu da (Turkia) herrialdea "demokraziara eramango duen plana prestatzeko". Atzo amnistia orokorra eman zuen Bashar al Assad presidenteak, baina AEBek denbora irabazi nahian dela uste dute, eta Frantziak keinu "argiagoak" eskatu dizkio.
"Helburua Siria zapalkuntzatik ateratzeko bide orri batekin ateratzea da, eta askatasunerako eta demokraziarako iraultza babestea", esan du Moulhem Droubi Anaia Musulmanen kideak. Oposizioko talde indartsuenetako bat da hori, eta amnistia orokorra eurentzat ere baden arren, ez dute euren aldarrikapenetan atzera egingo.
Oposizioaren eskaeren artean, hala ere, ez dute Al Assaden dimisioa sartuko, izan ere, hori aitzakia hartuta presidenteak Sirian dauden herritarren aurka egingo duela uste baitu. Sirian sortu den erreboltak siriarren esku jarraitu behar duela gainertu dute, talde jakin bat buruan izan gabe, erreboltak bere oinarriak manten ditzan.
Gobernuz kanpoko erakundeen arabera, protestak hasi zirenetik milatik gora pertsona hil dira Sirian.
