Hondamendia Asia hego-ekialdean gaur urtebete

Asiako hegoaldeko kostaldea suntsitu zuen ‘tsunamiaren’ lehen urteurrena oroituko dute egun osoan zehar

Gaur duela urtebete, 2004ko abenduaren 26an, 200.000 lagun baino gehiago hil ziren Asia hego-ekialdean inoizko itsas-ikara handienaren ondorioz. Hainbat ekitaldi antolatu dituzte Asian i=tsunamiak=i eragindako hondamendia oroitzeko. Duela urtebete onik irtetea lortu zutenak eta hildakoen senide zein lagunak Asia hegoaldeko meskitetan, elizetan, hondartzetan eta hobi komunetan bildu dira, besteak beste. Isiltasuna, loreak eta malkoak izan dira nagusi hildako eta desagertuak gogoan zituzten bitartean. Halaber, kaltetuek jaso dituzten laguntzak ez direla nahikoa izan salatu dute.

2005eko abenduaren 26a

16:13

Entzun 00:00:00 00:00:00

Indonesia, Tailandia, Sri Lanka eta India jo zituen olatu erraldoiak hark, besteak beste, baina eragina Somaliaraino iritsi zen. Urte bat geroago txikizioaren ostean jasotako milaka euroko diru laguntzak ez dira nahikoa izan. Milaka lagun etxerik gabe daude oraindik eta berreraikuntza guztiz burutzeko urte asko beharko dituztela diote. Laguntzak ez dira ongi bideratu leku guztietan.

Hondamendiak utzitako benetako zenbakiak, baina, ez dira beharbada sekula argitara emango. NBE Nazio Batuen Erakundearen arabera, hildako eta desagertuak 223.000 baino gehiago izan ziren. 400.000 etxebizitza suntsitu zituen olatu erraldoiak eta bi milioi pertsona baino gehiago etxerik gabe geratu ziren. Nazioarteko laguntza inoiz baino handiagoa izan zen 11.500 milioi euro bidali ziren Asia hegoaldera.

Aukeratu BERRIA gogoko iturri gisa Googlen. Aktibatu hemen

Iruzkinak

Ez dago iruzkinik

Ordenatu

Gehien irakurriak