Ez da erraza izango Edward Snowden AEBetako NSAko langile ohia Xeremetievoko aireportutik (Mosku) babes politikoa eskaini dion herrialde batera joatea. Ekainaren 23tik dago han, pasaporterik gabe eta AEBak atzetik dituela. Oraindik ez du adierazi ez Snowdenek ez Wikileaksek zein herrialderen babespean geratuko den, baina Latinoamerikan izango da —azken orduko aldaketarik ez bada—: Moskutik Bolivia, Nikaragua edo, ziurrenik, Venezuelara nola iritsi da orain gakoa.
Horregatik, bidaia errazteko, kanpaina berezia antolatu du Wikileaksek: Askatasunaren hegaldia. Duela bi egun bota zuen txioa Twitterren, hurrengo egunean kanpaina abiatuko zutela esanez, baina ordutik ez du hari buruzko xehetasun gehiagorik argitaratu. Kanpaina horren bidez, nazioartean garrantzia duten pertsonak bildu nahi ditu, Snowdenek bidaiatuko duen hegazkin berean bidaiatu dezaten: NSAko langile ohia babestuko duen "giza ezkutua" osatuko dute. Hegaldi horretan bertan kazetari eta hedabideek parte har dezaketela iragarri du Wikileaksek, une oro gertatzen denaren berri emateko. Dagoeneko, "giza ezkutuan" parte hartzeko prest agertu dira zenbait pertsona, besteak beste, Birgitta Jonsdottir Islandiako parlamentari eta Wikileaksen kolaboratzailea, John Cusack aktorea eta John Perry, beste gauza batzuen artean, abesti-idazle ohia eta Prentsa Askatasuna fundazioaren sortzailea.
Susmo txarra hartuta
AEBak Snowdenekin zer gertatuko zain daude. Hainbat herrialderi egin die estradizio eskaera, eta adierazi dute Snowdenek nonbait egon behar badu AEBetan egon behar duela eta hara soilik bidaiatu beharko lukeela. Bide diplomatikoen bidez Snowdenen helburu edo iraganbide izan daitezkeen herrialdeekin kontaktuan dagoela adierazi dute AEBek.
Fernando Valenzuela Europako Batasuneko (EB) Errusiaren enbaxadoreak adierazi duenez, EBk ez du gaiarekiko jarrera jakin bat: batasuneko kide den herrialde bakoitzak bere gain du Snowdeni babes politikoa eman edo ez erabakitzeko eskumena. Izatez, Europako hainbat herrialdek eman diote ezezkoa Snowdeni, hain zuzen, euren legeen arabera herrialdean bertan egon behar duelako babes politikoaren eskatzaileak eskaera egiten duen momentuan.
