Gezi parkea eta Taksim plaza milaka pertsonak okupatu dute bi astean, Turkiako Gobernuaren aurka protesta egiteko, eta Polizia bortizki oldartu bazaie ere, han jarraitzen dute oraindik; ez luzerako, ordea. Gobernua ez dago prest egoera bere horretan uzteko. "Amei eta aitei seme-alabak parketik ateratzeko deia egiten diet", esan du Erdoganek. "Ezin dugu gehiago itxaron, parkea ez delako inbaditzaileena, jendearena baizik".
Gezi parkeaz, protestak eragin dituen hirigintza proiektuaz, erreferenduma egiteko prest zegoela jakinarazi zuen atzo gobernuko AKP Justizia eta Garapena alderdiak, baina manifestariek ez dute onartu, eta protestan jarraituko dutela esan dute. Lau hildako eta milaka zauritu izan dira Turkian protestak hasiz gero, eta ehunka atxilotu dituzte.
