Behatzaileek gardentasuna nabarmendu dute bozetan

AEE Amerikako Estatuen Erakundeak Mexikoko bozetan «lasaitasuna, errespetua eta ordena» nabarmendu ditu. Hauteskunde prozesua «arrakastatsua» izan dela adierazi du erakundeko kide Cesar Gaviriak, Kolonbiako presidente ohiak. Nazioarteko 900 behatzaile egon dira bozak zaintzen, tartean ezker abertzaleko ordezkari Asier Altuna. Dena den, guztia ez da lasaia izan bozetan. Chiapaseko Rincon Chamulan, hiru lagun hil eta beste hiru zauritu zituzten bozkaleku batean. PRI Alderdi Iraultzaile Instituzionaleko eta PVEM alderdi ekologistako jarraitzaileen artean piztu ziren liskarrak. Lekukoen hitzetan, alderdi horietako herriko hautagaiek eztabaida sustatu zuten.