Bernard Law, Bostongo artzapezpiku ohia gaur goizean hil da Erroman, 86 urte zituela. Lawek Bostongo apaizen ehunka pederastia kasu ezkutatu zituen, 1984 eta 2002 urteen artean, hiriko artzapezpiku zela. Eliza katolikoaren barruan gertatutako eskandalu handienetako bat izan zen hori. Ordutik, Eliza katolikoaren babespean jarraitu zuen Vatikanoan, eta ez zuen inoiz AEBetako justiziarekin kolaboratu.
The Globe egunkariak argitaratu zuen Bostongo apaizen pederastia kasua, eta eskandaluaren "figura zentraltzat" jo zuen Law. Urte horietan apaizen aurkako neurririk ez hartzea leporatu zitzaion, eta horiek elizaz aldatzera mugatu izana. Era horretan, Elizak haurren aurkako abusuen aurrean izaniko isiltasunaren ikur bilakatu zen.
Eskandalua publiko egin zenean dimisioa eman zuen, baina Juan Pablo II.ak Erromako Santa Handiena basilikako artzapez izendatu zuen, eta kargu hori izan zuen Benedikto XVI.ak 2011an kargugabetu zuen arte. Law Vatikanoan bizi izan zen ordutik.
Bostongo pederastia kasuak 2015. urtean hartu zuen indarra berriz, Spotlight filmak The Globeko kazetarien lana pantaila handira eraman zuenean.
