Open Arms ontzian 160 bat migratzaile daramatzate dagoeneko. Bederatzigarren eguna dute gaur haietako 121ek, eta horrek "segurtasun arazo handiak" eragin dituela salatu du ontziaren ardura duen gobernuz kanpoko erakundeak. Bart erreskatatu dituzte azken 39 migratzaileak, Malta inguruan. Maltako Gobernuak porturatzeko baimena eman die azken horiei; ez, ordea, ontzian doazen gainerako pertsonei. Maltako agintariek argudiatu dutenez, 39 migratzaileak erreskatatzeko operatibo bat abian zuten, baina aurreratu egin zitzaien Open Arms. Azken horiek Maltaren "ardurapeko eremuan" jaso zituztela esan dute, eta horregatik hartuko dituztela; ez, ordea, gainerakoak.
Open Arms gobernuz kanpoko erakundeak "onartezintzat" jo du erabaki hori, bederatzi egun baitaramatzate ontzian migratzaile horiek. OIM Migrazioetarako Nazioarteko Erakundearen arabera, gutxienez 840 lagunek galdu dute bizia Mediterraneo itsasoan urte hasi zenetik.
Atzo bezala, Ongi Etorri Errefuxiatuak elkarteak elkarretaratzea egin du gaur ere Bilboko Moiua plazan, Italiako eta Maltako gobernuen "ezezko kriminala" salatzeko eta herrialdeei eskatzeko harrera egin dezatela. Europako Batzordearen eta gobernu kideen "konplizitatea" ere salatu dute. "Burokrazia eta nekropolitika" amaitzeko eskatu dute: "Herritarren gehiengoak Mediterraneoan biziak, duintasuna eta giza eskubideak salbatzea nahi du".
âÂÂœ‹ðŸ¿Basta de burocracias y #necropoliticas! La mayoría de la ciudadanía queremos que se salven las vidas, la dignidad y los derechos humanos en el #Mediterraneo. #Bilbon orain!! #NeukHartukoDut#YoAcojo#PasajeSeguroYa@Caravana_AF@CanalMigrantes@CaravanaObrim@ObrimFrontVlcpic.twitter.com/BLJ8f6OTMx
— Ongi Etorri Errefuxiatuak Bizkaia (@oeebizkaia) August 10, 2019
Ocean Viking ontziak, bestalde, beste 80 migratzaile erreskatatu zituen atzo. Mugarik Gabeko Medikuak eta SOS Mediterraneoa erakundeen salbamendu ontzia da Ocean Viking, eta, adierazi dutenez, lau haur daude erreskatatu dituzten migratzaile eta errefuxiatuen artean.
