Hamasei orduko bilkuraren ostean, Kaledonia Berriko ordezkari politikoek eta Edouard Philippe Frantziako lehen ministroak bigarren independentzia erreferendumari buruzko lehen xehetasunak eman dituzte. Lehen ministroak jakinarazi du bi data jarri dituztela mahai gainean galdeketa hori egiteko, eta "datozen 15 egunetan" erabakiko duela bietako zein proposatu: 2020ko abuztuaren 30a edo irailaren 6a.
Lehen galdeketa 2018ko azaroaren 4an egin zuten, eta independentziaren aurkakoek irabazi zuten: %56,6-43,3. Dena den, independentziaren aldekoentzat garaipen txiki bat izan zen, espero baino emaitza hobeak lortu baitzituzten. Iragan maiatzean ere, Kaledonia Berriko Kongresurako bozetan loialistekiko tartea txikitzea lortu zuten, eta, egun, bi diputaturen aldea dago bien artean: independentistek 26 ordezkari dituzte, eta independentziaren aurkakoek, 28.
Hauteskunde horietatik, bigarren galdeketa "ahalik eta azkarren" egiteko asmoa jarri du mahai gainean Kaledonia Berrian boterean dagoen Etorkizuna Konfiantzaz alderdi loialistak; 2020ko uztaila baino lehen nahi zuen. Independentistek, berriz, 2020ko azaro aldera egitea lehenetsi dute, baina azkenean Philippek bien arteko oreka lortu nahi izan du.
Le Comité des signataires de l’Accord de Nouméa que j'ai présidé hier a permis de fixer les conditions pour réussir l’organisation de la 2e consultation sur l’accession à la pleine souveraineté de la Nouvelle-Calédonie.
— Edouard Philippe (@EPhilippePM) October 11, 2019
J'ai proposé qu'elle se tienne le 30/08 ou le 06/09/2020. pic.twitter.com/kqEDSC05r0
Iazko galdeketan, gatazka handia sortu zuen hautesle erroldak, eta, azkenean, bi aldeak ados jarri ziren bozketatik kanpo geratuko ziren 11.000 kanak zerrendan sartzeko. Arazoa, ordea, ez zen guztiz konpondu, eta, datorren urteko erreferendumari begira, errolda "eguneratzeko" konpromisoa hartu du Philippek.
Datorren urteko erreferendumean ere ezezkoak irabaziko balu, beranduenez 2022an hirugarren galdeketa egingo lukete, 1998ko Noumeako Akordioan adosturikoaren arabera. Erreferendum hori ez lukete egingo "2021eko irailaren erdialdearen eta 2022ko abuztuaren artean".
Izan ere, tarte horretan hainbat hauteskunde dituzte Frantzian: eskualdeetarakoak, presidentetzarakoak eta parlamenturakoak.
