Azkenean, Brasilgo Auzitegi Goreneko nahikoa epailek egin dute Jair Bolsonaro Brasilgo presidente ohiaren kontra, eta errudun jo dute 2023ko urtarrilean estatu kolpea ematen saiatzeagatik Luiz Inazio da Silva Lula presidentearen aurka. Delitu hauengatik ere zigortu dute: zuzenbide estatua desegiten saiatzea, ondasun publikoei zein ondareari kalte egitea eta erakunde kriminal bateko kidea izatea; izan ere, Bolsonaro ez ezik, bere gertuko beste zazpi pertsona ere erruduntzat jo dituzte —armadako bost goi kargudun eta bi zibil—. Lehenbiziko aldia da non Brasilgo auzitegi batek errudun jo duen presidente ohi bat estatu kolpea ematen saiatzeagatik. Armadako goi kargudunentzat ere estreinako aldia da.
Akusatuetako inor ere ez zegoen atzo auzitegian, Carmen Lucia Antunes epaileak bere erabakia eman zuenean. Bost epailek osatu dute mahaia, eta hiruk egin dute akusatuen kontra; gehiengoak, dagoeneko —batek ez zigortzearen alde egin du, eta bosgarrenaren iritzia falta da; epaileek bihar emango dute ebazpenaren berri—. Iritzia alda dezakete, nahiz eta ez den horrelakorik espero. Izan ere, Antunesek atzo nabarmendu zuen frogatuta dagoela estatu kolpe saiakeran «biolentzia» egon zela: «Errepublikaren arima mindu eta bahitu nahi zuten». Epaile horren arabera, «Jair Bolsonarok zuzendutako talde batek, zeina [Brasilgo] Gobernuko kide garrantzitsuek osatzen zuten, instituzio demokratikoei eraso egiteko plana egin zuen». Horren helburua zen presidente aldaketa «kaltetzea» eta botereak «leherraraztea», bereziki, judiziala. Alexandre de Moraes epailearen arabera, berriz, «proiektu autoritarioa» osatu zuen presidente ohiak, presidentetzarako bozak galduagatik ere karguan jarraitzeko.
Bolsonaro 2019tik 2023 hasiera-hasierara arte izan zen Brasilgo presidentea. 2022an egin zituzten presidentetzarako bozak, eta Lulak irabazi zituen. 2023a hastearekin batera hartu zuen kargua, eta Bolsonarok, zeinak boz horiek galdu zituen, kontra egin nahi izan zion; hortik astebetera saiatu zen estatu kolpea ematen, urtarrilaren 8an: milaka lagunek Hiru Botereen Plazan egin zuten protesta, Brasilian —han daude presidentetzaren egoitza, Brasilgo Kongresua eta Auzitegi Gorena—. Brasilgo fiskaltzak iragan otsailean egotzi zizkion delituak Bolsonarori, eta irailaren hasieran ekin zioten epaiketari. Lehenxeago, abuztuan, etxeko atxiloaldia ezarri zion gorenak, aurreko hilabetean ihes egiteko edo Lularen aurkako ideiak zabaltzeko arriskuagatik ezarritako neurri batzuk apurtzeagatik.
Aurrez ere inhabilitatu zuten, eta debekatu egin zioten 2030era arte bozetara berriz aurkeztea, botere gehiegikeriagatik: hauteskunde sistema zalantzan jartzea egotzi zioten
