Dalai Lamak ofizialki egin dio gaur Tibeteko Legebiltzarrari tibetarren buruzagitza politikoa uzteko eskaera. Aurreko astean iragarri zuen proposamena, eta horrekin batera aurrerantzean tibetarrek "modu librean" euren lider politikoa nor izango den aukeratu ahal izatea ere proposatu zuen. Dalai Lama aurrerantzean lider espirituala izango da soilik.
"Gobernu sistema batek ezin du egonkortasuna eta garapena bermatu pertsona baten baitan baldin badago soilik, herritarren babesik eta parte hartzerik gabe", esan du Dalai Lamak. "Anakronikoa da", gaineratu du. Tibeteko Legebiltzarra Indiako Dharamsala herrian dago erbestaratuta, eta proposamena aztertu beharko du orain. Zazpi eta hamar egun bitartean beharko dituzte erabaki bat hartzeko.
