Zorrotz zainduko du Espainiako Gobernuak Kataluniakoa. Abisua eman zuen bezala, ahal dituen neurri guztiak hartuko ditu Generalitateak ez dezan egin urriaren 1ean egin nahi duen galdeketa. Diruarekin egin du mehatxu oraingoan, eta, zentimo bakoitza non gastatzen duen azalduz, astero txostena bidaltzeko agindu dio. Dirua galdeketarako jartzen duela ikusten badu, edo Kataluniak txostenak igortzeari uko egiten badio, Espainiak itxi egingo dio diru iturria. Eta Likidezia Funts Autonomikotik ez dio zentimorik emango.
Espainiako Gobernu Kontseiluak gaur egin duen bileran hartu du erabakia, eta halaxe jakinarazi du Iñigo Mendez de Vigo bozeramaileak bilera osteko prentsaurrekoan.
Erreferendumera diru sailik ez dela bideratzen egiaztatu nahi du horrela Espainiako Gobernuak. Auzitegi Konstituzionalak ere eman zion abisu gobernuari halakorik ez zuela egin. Aurrekontuetan erreferendumera bideratutako diru sail zehatzik ez dagoenez ezin zuela hura baliogabetu aitortu arren, Generalitateari ohartarazi zion konstituzioaren aurkakoa dela diru publikoa galdeketa antolatzeko erabiltzea.
