Dominique Pelicotekin harremana zuen gizon bat epaitzen hasi dira gaur Lyonen (Frantzia), bikotekidea drogatzea eta bortxatzea egotzita. Dominique Pelicoti hogei urteko kartzela zigorra ezarri zioten 2024ko abenduan, bere emazte Gisele Pelicot bortxatzeagatik.
AFP France-Presse albiste agentziak eskuratu du instrukzioko epaileek kasuaz egindako laburpena, eta hartan nabarmendu dute gizon hori harremanetan jarri zela Pelicotekin, hark emaztea drogatzeko eta bortxatzeko zuen «eskarmentuaz» baliatzeko asmoz.
Duela bi urte atxilotu zuten auzipetua. Zenbait hedabidek kaleratu dutenez, izen handiko bezeroen bizkartzain gisa lan egiten zuen. Ukatu egin ditu karguak, haren abokatuaren esanetan. Frantziako hedabideek jaso dutenez, ikerketak erakusten du harremanetan jarri zela Pelicotekin; abokatuaren arabera, ordea, horrek ez du esan nahi haren «dizipulua» zenik.
Epaileen laburpenean jaso dutenez, auzipetuaren bikotekideak deklaratu zuen hiru urtez «neke handia» pairatu zuela, hori zerk eragiten zion jakin gabe. Gainera, bihotzeko arazoak eta zorabioak ere nozitu zituen, besteak beste.
Gisele Pelicot ia hamar urtez bortxatu zuten haren senarrak eta beste 50 gizon inguruk. Beste horiei ezarritako zigorrak eskatutakoak baino arinagoak izan ziren: hiru eta hamabost urte artekoak.
