Estatus berezia ezartzearen helburuak zerrendatu ditu Ukrainako Gobernuak, webgunean plazaratu duen oharrean. Egoeraren normalizaziorako baldintzak sortzea, ordena juridikoa berrezartzea, ihes egindakoen itzulera eta lurraldeon garapena aipatu ditu, besteak beste. Horrekin batera, estatuak hainbat mekanismo ezarriko ditu martxan, eremu horien garapen sozioekonomikoan laguntzeko.
Matxinoek Luhansk eta Donetsk eskualdeen "osotasuna" aldarrikatzen dute; Kieven proposamena, ordea, eskumenak soilik matxinoek kontrolatzen duten eremuari ematea da. Ukrainako Parlamentuak irailaren 16an onartu zuen Poroxenko presidenteak aurkeztutako autonomia legea, matxinoen esku dauden lurraldeetan autogobernua ezartzeko.
