Kurdistango Gizarte Demokratikoaren Alderdia (DTP) legez kanpo uztea ebatzi du gaur Turkiako Auzitegi Konstituzionalak, Estatuko Fiskaltzak hala eskatuta. DTPklegez kanpoko Kurdistango Langileriaren Alderdiarekin (PKK) duen ustezko harremanean arrazoitu du erabakia auzitegiak. Alderdiko 37 kideri hurrengo bortz urtean politikan aritzea debekatu die, baita ere. Horien artean dago Ahmed Turk DTPko buruzagia. Alderdiaren diru kontuetan esku hartzea ere erabaki du Auzitegi Konstituzionalak.
Turkiako NTV telebista kateak jakinarazi duenez, Auzitegi Nazionaleko presidente Hasim Kilicek erran du Euskal Herriko Batasuna alderdiaren aurkako legez kanporatze prozesua kontutan hartu dutela ebazpena egiterako orduan. "Terrorismoarekin nahasten den alderdi bati ezin zaio antolatzeko askatasuna eman", adierazi du Kilicek.
DTPren kontrako prozesua Turkiako fiskaltzak hasi zuen, PKKrekin harremanak izan eta "herrialdearen batasuna arriskuan paratzen duen ekintza iturria" izatea egotzita.
DTPk 21 diputatu ditu Turkiako Asanblada Nazionalean, eta Turkiaren menpeko Kurdistango alderdi politiko nagusia da. Ilegalizazioa gertatuz gero, diputatuek euren jarlekuak utziko zituztela jakinarazi zuen alderdiko presidente Turkek.
Orain arte bertze bortz alderdi kurdu jo dituzte legez kanpokotzat, eta horren harira sortu zuten DTP 2005ean.
Mundua
DTP alderdi kurdua legez kanpo utzi du Turkiako Auzitegi Konstituzionalak
Iruzkinak
Ez dago iruzkinik
Ordenatu
