Batek esan, besteak erantzun, eta alderantziz. Baina Errusia eta Ukraina, AEBak bitartekari ari direla, gaur-gaurkoz ez daude ados jartzeko moduan. Izan ere, gaur Moskuk nabarmendu du beharbada uko egingo diola Donetsk eskualdea osorik militarki hartzeari —Ukraina ekialdeko lurralde horren %80 du kontrolpean—, baina asmoa duela konkistatzeko falta zaion eremu horretan Errusiako Guardia Nazionala eta Polizia edukitzea etorkizunean. Hori esan du gaur Juri Uxakovek, Vladimir Putin Errusiako presidentearen aholkulariak, Kommersant egunkariari emandako elkarrizketa batean.
Eta bi aldeak ados jartzetik urrun daude, Volodimir Zelenski Ukrainako presidenteak atzo gauean Kieven emandako prentsaurreko batean esandakoak kontuan hartuz gero. Adierazi zuen AEBek proposamen bat egin dutela Donetski dagokionez: Ukrainak tropak ateratzea oraindik kontrolpean dituen eremutik —%20 inguru—, Washingtonek han «esparru ekonomiko aske bat» sortzearen truke.
Ukrainak kontrolatzen duen Donetskeko eremu horretan, lur arraroen erreserbak daude, eta gero eta argiago geratzen ari da, hortaz, interes ekonomikoek bultzatuta ari dela Donald Trump AEBetako presidentearen gobernua. Dena den, ez dago argi AEBek zehazki zer planteatzen duten kontzeptu horrekin. «Ez dago argi nork gobernatuko duen lurralde hori, 'esparru ekonomiko askea' edo 'eremu desmilitarizatua' deitzen dioten hori», esan zuen Zelenskik. Ukrainako presidenteak esan izan du ez zuela kontzesiorik egingo lurraldetasun auzian, baina, negoziazioak nola doazen ikusita, ematen du kontrakoa egiteko prest dagoela.
9Moskuko auzitegi batek Hagako zenbat fiskal eta epaile zigortu dituen. Nazioarteko immunitatea duten estatu baten ordezkariei jazartzen ari zaizkiela iritzita, Moskuko auzitegi batek Nazioarteko Zigor Auzitegiko bederatzi kide zigortu ditu gaur —fiskalak eta epaileak—, in absentia. Gerra krimenak egotzita, Vladimir Putin Errusiako presidentea atxilotzeko agindua eman zuen Hagak 2023ko martxoan.
Uxakovek gaur esan duenez, Moskuk bere indarrak mantendu nahi ditu eremu horretan, «ordena publikoa bermatzeko». Aintzat hartzekoa da Donetsken sentipen errusiar nabarmena dagoela. Zelenskiren hitzetan, Kievek AEBen eskari hori jasoko lukeen plan bat onartuko balu, hori berresteko beharrezkoa litzateke Ukrainan erreferenduma egitea.
Trumpek Errusiaren oniritziarekin Ukrainarako duela hiru aste planteatutako 28 puntuko planaren arabera, Kievek kontzesio nabarmenak egin beharko lituzke lurraldetasunari dagokionez. Donbass, hau da, Donetsk eta Luhansk —osorik okupatua du Moskuk—, Errusiaren esku geratuko litzateke, eta Kherson eta Zaporizhia banatuko lituzkete, kontuan hartuta gaur-gaurkoz fronteko lerroak nola zatitzen dituen; Moskuk bi heren inguru kontrolatzen ditu bietan.
Kievek aldaketa batzuk egitea proposatu du. Negoziazioen berri duten iturriak aipatuta, hori kaleratu zuen atzo Axios AEBetako hedabideak, eta Friedrich Merz Alemaniako kantzilerrak baieztatu zuen geroxeago; hau da, Ukrainak Washingtoni jakinarazi diola zer aldaketa egiteko prest dagoen. Ondoren heldu ziren Zelenskiren hitzak, eta gogorarazi zuen, duela bizpahiru egun esan bezala, prest dagoela 60-90 eguneko epean bozetara deitzeko, baldin eta AEBek eta Europako aliatuek laguntzen badiote horietarako segurtasuna bermatzen. Errusiak, hain zuzen, zilegitasun falta egotzi izan dio Zelenskiri.
