Benetako Finlandiarrak (PS) eskuin muturreko alderdiak Finlandian atzo egin ziren hauteskundeetan botoen %19 jaso zuen, eta hirugarren indar politikoa izanik, gobernua osatzeko giltza izango da datozen egunetan. Koalizio Nazionaleko Alderdiak (KOK) irabazi ditu bozak, botoen %20,4rekin, eta Alderdi Sozialdedemokrata (SDP) bigarren izan da, %19,01ekin. Orain arte KOK alderdia zegoen Gobernuan, Zentroko Alderdiaren (KESK) babesarekin. Horrek orain, ordea, botoen %15 jaso du, eta bere babesa ez da nahikoa izango Gobernua osatzeko.
Beste alderdiekin koalizioa osatzeko prest agertu da PS, eta oraingoz ez dirudi ez KOKi ezta SDPri ere koalizioa eskuin muturrarekin osatzea axola zaienik. Alderdi xenofoboa da PS, eta Europa hegoaldeko herritarrei ere Finaldiako mugak ixtearen aldekoa da. Gobernuan sartzen bada, Euroguneko egonkortasuna arriskuan jarri dezake, Portugalen erreskatearen aurkakoa baita. Hauteskunde kanpainan erreskate horren aurkako betoa ezarriko zuela iragarri zuen.
