Astelehen gauerdian hasiko da juridikoki Europako Batzorde berriaren agintealdia. Nolanahi ere, Europako Kontseiluaren oniritzia lortu behar du aurrena; bihar jasoko du babes hori, EBko 25 estatuetako Justizia eta Barne ministroek Bruselan egingo duten bileran.
Barrosoren taldeak 25 kide ditu bera barne dela, hau da, estatu bakoitzeko ordezkari bat. Europako popularren gehiengoak proposamenaren alde bozkatu du eta eurodiputatu sozialista gehienek ere bai. Aldiz, Berdeen eta Ezker Bateratuaren ordezkariek kontrako botoa eman dute.
EAJren izenean Galeuzca koalizioarekin aurkeztu zen Josu Ortuondo abstenitu egin da. EA Herrien Europa koalizioarekin aurkeztu zen, eta ERCko Joan Bernat katalanak erdietsi zuen eserlekua. Hark kontra bozkatu du.
Euskal Herriko gainerako europarlamentariek —Mayor Oreja (PP), Iturgaitz (PP), Pomes (PP), Diez (PSOE), Durkhop (PSOE) eta Lamassoure— alde bozkatu dute.
Europako Batzordea
Eurodiputatuen %60en babesa jaso du Barrosoren komisario taldeak
Europako Legebiltzarrak oniritzi zabala eman dio Jose Manuel Durao Barroso Europako Batzordeko presidente hautatu portugaldarrak aurkeztu duen komisario taldeari. Zehazki, 499 eurodiputatuk eman dute Barrosok aurkeztutako taldearen aldeko boza, 149k aurka bozkatu dute eta 82 abstenitu egin dira; finean, Legebiltzarraren %60ren babesa jaso du komisario taldeak, Europako Batzordeko kideen talde batek inoiz jaso duen onarpen handiena. Nolanahi ere, Barrosok atzera bota behar izan zuen hasierako komisario proposamena, tartean homosexualen eta emakumeen kontrako jarrerak agertu zituzten komisariogaiak zeudelako.
Iruzkinak
Ez dago iruzkinik
Ordenatu
