Arrazakeria, koronabirusa eta, orain, klima aldaketa bilakatu da AEBetako presidentetzarako bozetako protagonista. Izan ere, herrialdeko mendebaldean piztutako suteek bi milioi hektarea erre dituzte dagoeneko Kalifornian, Oregonen eta Washingtonen, baita 35 hildako eragin ere, abuztu hasieran zabaltzen hasi zirenetik.
Kalifornian, igandean 29 su zeuden kontrolik gabe, eta haize indartsuak espero zituzten gaurko. Oregonen ere alerta gorria jarri dute. Han, suteak hainbat etxe suntsitu ditu, eta 30 bat foku daude kontrolik gabe; haietako handienak 89 kilometro zabal ditu. Oregongo gobernadorearen arabera, hamar dira hildakoak, baina beste dozenaka desagerturik daude. Washingtonen, berriz, bakarra da, oraingoz, hildakoa, eta bost dira kontrolatu gabe dauden suteak.
Adituek klima aldaketaren ondoriotzat jotzen dituzte suteak, baina Donald Trump jarduneko presidenteak, berriz, «kudeaketa txarrari» egotzi dio gertatutakoa. Aldiz, Oregongo gobernadore Kate Brownen esanetan, klima aldaketaren zuzeneko ondorioa dira suteak: «Haizete izugarriak eta tenperatura beroak izan ditugu azken asteetan, eta horri gehitu behar zaio azken 30 urteotako lehortea. Bada garaia gai honi behar bezala hel diezaiogun; alerta dei bat izan dira suteak».
