Bart gauean istripua izan dute bi trenek Adamuzen, Kordoban (Espainia). Gutxienez 39 pertsona hil dira, eta Andaluziako 112 Larrialdi Zerbitzuko iturriek jakinarazi dute gehiago ere izan litezkeela. Eguna argitzerako abiatuko dituzte bilaketa lanak. 73 pertsona ere ospitaleratu behar izan dituzte; jakinarazi dute horietatik 24 larri daudela. Guztira 152 dira zaurituak.
Madril eta Malaga (Espainia) arteko bidaia egiten ari zen Iryo enpresako tren bat errailetik atera da. Adamuz herrira bideratzeko irteera batean gertatu da ezbeharra, bart gaueko 19:45 aldera. Ondoko trenbidetik pasatzen ari zen Madrildik Huelvarako bidea egiten ari zen beste tren bat, Renfekoa, eta elkar jo dute. Bi trenak bidetik atera dira eta zenbait bagoi irauli egin dira: lehen treneko azken hirurak eta bigarreneko bi lehenak. Bagoi batzuk lau metroko amildegi batera erori dira.
Oscar Puente Espainiako Garraio ministroak Xn adierazi du kolpea «izugarria» izan zela, eta bigarren trenaren azken bi bagoiak «airean» atera zirela. Halaber, nabarmendu du «oso arraroa eta azaltzeko zaila» dela istripua gertatu izana, trena berria zelako —2022an ekoitzia—, eta ezbeharra jazo den trenbidea ere orain dela hilabete eskas batzuk berritu zituztelako, iazko udaberrian zehazki. Iryo Italiako tren konpainiak jakinarazi duenez, bidetik atera den trena —Iryo 6189— urtarrilaren 15ean ikuskatu zuten.
Beraz, oraindik ez dakite zerk eragin duen istripua, eta hura ikertzeko adituen batzorde bat eratuko dutela iragarri du Puentek. Madril eta Andaluzia arteko abiadura handiko trenen zirkulazioa bertan behera utzi dute, eta Alvaro Fernandez Heredia Renfeko presidenteak ohartarazi duenez, ez da berehala berreskuratuko. «Renfeko bi ibilgailuak txikituta daude», iristeko zaila den leku batean. Hori dela eta, istripua izan duten bagoiak ateratzeko denbora beharko dute. Gainera, azpiegitura berritu beharko dutela azaldu du, «trenbidea, seinalizazioa... egun batzuk emango dituzte».
Andaluziako 112 larrialdietako zerbitzuek zabaldutako informazioaren arabera, ezbeharraren bidaiariak eta haien senitartekoak Adamuz herritik Kordoba hiriburura eraman dituzte. Bertako zentro zibiko batean egokitu duten harrera gunean, besteak beste, Gurutze Gorria, psikologoak eta osasun zerbitzuak daude biktimei laguntzeko.
Espainiako Gobernuko iturriek jakinarazi dute Pedro Sanchez Espainiako presidentea bertaratzekoa dela istripu lekura. Bestalde, Sanchezek bertan behera utzi du gaurko agenda instituzionala, eta, bihar ere ez da joango Davosera (Suitza). Munduko Ekonomia Foroaren (WEF) 56. ekitaldia ospatuko da bertan gaurtik 23ra bitartean, eta bihar joatekoa zen Espainiako presidentea.
