Soldadu israeldarrek palestinar bat hil dute tiroz Jal Jul herrian, Hebron iparraldean (Zisjordania). Iturri ofizialen arabera, segurtasun indarren kontrol baten aurka jotzen saiatu da palestinarra eta militarrek tiroz hil dute. Omar al Hroub izena zuen, eta 55 urte zituen.
Hebronen bertan beste palestinar bat hil dute tiroz; Uday Irsheid 24 urteko gaztea. Hamas mugimenduaren sorreraren urtemuga ari ziren ospatzen Israelgo soldaduekin istiluak sortu direnean.
Gazan ere manifestazio batean hil dute beste palestinar bat: 41 urteko Sami Shawqi Mahdi. Maan berri agentziaren arabera, beste zazpi palestinar zauritu dira.
