Pakistan eta Indiaren arteko mugatik gertu izan da atentatua, Wagahen. Jundula Al-Qaedari lotutako erakundeak eta Tehrik-e-Taliban Pakistan (TTP) taldeari lotutako beste bi erakundek hartu dute bere gain erasoa.
Indiako eta Pakistango herritar eta ordezkariek urtero egiten duten ekitaldi baten amaieran jazo zen atentatua. Gazte batek bere buruaz beste egin zuen, gorputzean zeramatzan lehergailuak eztandaraziz, jendez beteta zegoen aparkaleku batean. Eztandak 57 hildako eta 112 zauritu eragin zituen.
Jamaat-ul-Ahrar TTPtik banandu berri den erakundea izan zen erasoa bere gain hartu zuen taldeetako bat. Ehsanula Ehsan bozeramaileak adierazi duenez, erasoa "Ipar Waziristanen izandako errugabeen heriotzaren mendekua" izan da, Pakistango armadak joan den uztailetik eremu horretan matxinoen aurka egindako operazioari erreferentzia eginez.
